 |
|
|
Ce steunu 'na vota tre cumpagni: Cric, Croc e Manicu d'ancinu, che iun' arrubbenne p' 'a casa d' 'a gente e s 'angappaunu tuttu chellu che puteun' angappà.
'Nda ru paese nisciunu steva cciù cuetu e quannu, mettemmu, s 'accireva nu puorcu, ru padrone steva sempe cu ' ru penzieru ca chisti tre alluorgi ce ru puteun' arrubbà.
Ru cciù sfaccimmu eva Manicu d'ancinu, ma gli 'auti dui, cu' chigliu mastu, nunn 'èunu cciù fessi. Succerette ca Manicu d'ancinu s'avea cresciutu nu begliu purcigliucciu e r'accirette 'nganna Natale. Ma ru penzieru ca Cric e Croc ce ru puteunu fotte, nu ru facea rorme, e accussì ricett' a' mugliera:
-Vagliò! mò m'arraccumannu, statti zitta, nu 'spann' 'a voce, sinnò, si chigli dui fetienti venn'a sapè ca ci'amm' accisu 'stu puorcu, ce ru venn'arrubbà. -
A mugliera, zitta e mosca, nu 'ricette nient 'a nisciunu. Ma Cric e Croc, nunn 'èunu dui fessi! Annasèunu ru fattu e se preparèunu pe' s'arrubbà ru puorcu. Roppu ca 'stu puorcu eva stat' accisu, 'a sera Manicu d'ancinu e 'a mugliera ru ciurèunu buonu buonu a ciavi 'nd' 'a rispenza e se ne jeun ' a dorme:
-Annascunni bona 'a ciavi - ricette Manicu d'ancinu a' mugliera - mittila addò nisciunu 'a po' truà. -
Ma, mente Manicu d'ancinu e 'a mugliera steun'a 'nzerrà ru puorcu 'nd' 'a rispenza, Cric steva già annascusu sott'a ru liettu e Croc steva 'mpustatu for' 'a casa. Manicu d'ancinu e 'a mugliera s'addurmeunu, e Cric, pe' sapè addò steva 'a ciavi d' 'a rispenza, ascette da sott'a ru liettu e se mettett 'a parlà sore sore 'nd' aureccia d' 'a femmena:
- Vagliò! Hai 'nnascosa bona 'a ciavi? .
E chella, rurmenne rurmenne:
- Sine! 'aggiu messa 'nda ru puzzu. -
Cric subbitu jett 'a ciamà a Croc! Piglieun' 'a ciavi, se futtèunu ru puorcu e, atteri futti, 'nda ru scuru, pe' ru Turiegliul 'ncoppa. Manicu d'ancinu, puru 'nda ru suonnu, tenea sempe ru penzieru: una bbotta se scetette e ricett' a mugliera:
-Vagliò! Chella ciavi add'hai messa? -
-E t' 'aggiu rittu! 'Nda ru puzzu! -
Manicu d'ancinu se mangett' 'a foglia e, atteru futti puru issu, scappette fore prima c' 'a mugliera feniv' 'e parlà. Mente se steun' a carrià ru puorcu, p' 'a via, Cric ricea a Croc:
- Te pesa? Otteru 'ncopp' 'e spalle mie, mò ru portu nu pocu i. -
Roppu nu pocu Croc ricea a Cric:
- Te pesa? Otteru 'ncopp' 'e spalle mie, mò ru portu ì. -
E nu pocu unu e nu pocu gli 'autu, se carriaunu 'stu puorcu. Manicu d'ancinu, zittu zittu, r'arrivette e, 'nda ru scuru, ricett'a Cric:
-Te pesa? Otteru 'ncopp' 'e spalle mie, mò ru portu 'n 'atu pocu ì. -
'Nce se verea manc' a jastemà e Cric ri passette ru puorcu. Manicu d'ancinu se 'utett' arretu e, atteru futti pe ' ru Turiegliu abbasciu, se purtette ru puorcu 'a casa. Roppu nu pocu Croc ricette a Cric:
-Te pesa? Fammigliu purtà 'n 'atu pocu a me. -
-E te r'aggiu ratu!!! -ricette Cric.
Se 'uardeunu tutti dui, verèunu ca ru puorcu 'nce steva cciù e rimanèunu comm 'a dui turzi. Manicu d'ancinu r'avea fatti fessi a tutti dui.
|
|
|
|
|
|
|
